ԵՊԲՀ. Բժշկական բուհը հյուրընկալեց կրծքագեղձի վերականգնմանը նվիրված միջազգային գիտաժողովը

Երևանի Մխիթար Հերացու անվան պետական բժշկական համալսարանում կրկին մասնագիտական եռուզեռ էր։ Այս անգամ բժշկական կադրերի 100-ամյա դարբնոցն իր տանիքի ներքո էր հյուրընկալել կրծքագեղձի քաղցկեղի կանխարգելմանն ու բուժմանը, կրծքագեղձի վերականգնմանը նվիրված միջազգային գիտաժողովը։

Բուհի հերթական ներկայացուցչական միջոցառմանը մասնակցում էին հայ և արտասահմանցի կրծքագեղձի վիրաբույժներ Հայաստանից, Իսպանիայից, Իրանից, Ռուսաստանի Դաշնությունից, Գերմանիայից, Հունգարիայից, Ֆինլանդիայից, Մեքսիկայից և Վրաստանից։

Հետբուհական և շարունակական կրթության գծով պրոռեկտոր Գառնիկ Ավետիսյանը, ողջունելով գիտաժողովի մասնակիցներին, փաստեց, որ պրակտիկ բժշկության արդի արագընթաց զարգացումները թելադրում են գիտական, ուսումնամեթոդական և հետազոտական ընդհանուր դաշտի ստեղծում, տարբեր երկրների մասնագետների՝ համատեղ և արդյունավետ աշխատելու, համագործակցելու անհրաժեշտություն, համաժողովների կազմակերպում, փորձի փոխանակում, մասնագիտական ունակությունների կատարելագործում և նոր տեխնոլոգիաների ներդրում։

«Գիտաժողովի նպատակն է քննարկել կրծքագեղձի չարորակ գոյացությունների վաղ ախտորոշման, վիրահատական բուժման և կրծքագեղձի վերականգնման ժամանակակից մոտեցումները։ Այս հարցում շատ կարևորվում է խնդրի նկատմամբ մուլտիդիսցիպլինար մոտեցումը և տարբեր մասնագիտությունների տեր բժիշկների համատեղ, համակարգված և թիմային աշխատանքը։ Վերջին տարիների ընթացքում Հայաստանում զգալի հաջողություններ են գրանցվել կրծքագեղձի չարորակ գոյացությունների վաղ ախտորոշման, կոնսերվատիվ և վիրահատական բուժման ասպարեզում։ Սակայն բժշկագիտությունը սրընթաց քայլերով է առաջ գնում ու նպաստում առողջապահության ոլորտում ավելի արդյունավետ, օրգանապահպան բուժման եղանակների ամրապնդմանը։ Նման մոտեցումն առավել պահանջված է կրծքագեղձի առողջության պահպանման հարցում։ Այս գիտաժողովը դրա վառ վկայությունն է», - շեշտեց Գառնիկ Ավետիսյանը` հավելելով, որ  ԵՊԲՀ-ն իր գործունեության 100 տարվա ընթացքում մշտապես նպաստել է բուհի բժիշկների շարունակական կրթությանը և մասնագիտական ունակությունների կատարելագործմանը։

«Եռօրյա այս գիտաժողովի հագեցած ծրագիրը, հրավիրված մասնագետների կազմը, մեր երիտասարդ և փորձված բժիշկների լայն մասնակցությունը խոստանում են ակտիվ և արդյունավետ աշխատանք։ Հատկապես հետաքրքիր և կարևոր են կրծքագեղձի վերականգնմանը նվիրված նորագույն մեթոդների և եղանակների ներդրման լայն հնարավորությունները։ Դրանք գտնվում են բարձր տեխնոլոգիաների դաշտում և շատ արդյունավետ են։ Կրծքագեղձի էսթետիկ վերականգնումը լիակատար առողջացումից հետո հնարավոր է դարձնում կնոջ առողջական, հոգեկան, հասարակական և սոցիալական լիարժեք վերականգնումը», - ընդգծեց Գառնիկ Ավետիսյանը՝ բարի երթ և արդյունավետ աշխատանք մաղթելով գիտաժողովի մասնակիցներին։

«Էրեբունի» բժշկական կենտրոնի պլաստիկ վիրաբուժության ծառայության ղեկավար, «Դա Վինչի» կլինիկայի տնօրեն, պլաստիկ վիրաբույժ Արմեն Հովհաննիսյանի խոսքով՝ այս գիտաժողովը նման ձևաչափի արդեն երկրորդ հանդիպումն է։

«Ծրագիրը բավականին հագեցած է, զեկույցները շատ հետաքրքիր են լինելու։ Մենք պլանավորում ենք տարին մեկ կամ նույնիսկ երկու անգամ Վերականգնողական վիրաբուժության երևանյան դպրոցի շրջանակում անցկացնել հետաքրքիր սեմինարներ, միջազգային համագումարներ», - նշեց նա։  

Իսպանացի պլաստիկ վիրաբույժ, կրծքագեղձի վերականգնման մասնագետ Ժաումե Մասիան հայտնեց, որ երկրորդ անգամ է Երևանում։

«Շատ հաճելի է կրկին այստեղ գտնվել։ Ես հնարավորություն ունեցա ծանոթանալ երկրի հետ անցյալ տարի՝ մարտին։ Պետք է ասեմ, որ Հայաստանը և հայ ժողովրդը «գողացան» իմ հոգին, հենց այդ պատճառով էլ նորից այստեղ եմ։ Վստահ եմ՝ կփոխանակենք մեր գիտելիքներրը կրծքագեղձի վիրաբուժության բոլոր ոլորտներում։ Առանցքային անհրաժեշտություն է փոխադարձ կապի հաստատումը։ Մենք պետք է ստեղծենք հարմարավետ միջավայր, ինտերակտիվ կրթական հարթակ արդյունավետ քննարկումների համար», - շեշտեց Ժաումե Մասիան։

Եվրոպայում ճանաչված իրանցի վիրաբույժ Փարիսա Ազիմին ևս անկեղծացավ․ «Երևանում գտնվելով՝ հիշեցի այն հին օրերը, երբ հայկական դպրոց էի գնում Թավրիզում՝ իմ հայրենի քաղաքում։ Շնորհակալ եմ ինձ հրավիրելու համար։ Իրանում քիչ են կրծքագեղձի վիրաբույժներրը, այդ պատճառով մենք շատ աշխատանք ունենք անելու», - ավելացրեց նա։

«Գիտաժողովը կօգնի մեզ փոխանակվել փորձով, գիտելիքներով, բարելավել կրծքագեղձի քաղցկեղի բուժման և կանխարգելման մեր տեխնիկան, մեր որոշումներն այդ ասպարեզում», - ասաց Ռուս ուռուցքաբան-մամոլոգ, վիրաբույժ Սերգեյ Մալիգինը:

«Վաղ ախտորոշման կարևորությունը կրծքագեղձի վիրաբուժության ոլորտում» վերտառությամբ քննարկմանը զեկույցով հանդես եկավ  Հայ-Ամերիկյան առողջության կենտրոնի ռադիոլոգիայի բաժնի վարիչ, բժիշկ-ռադիոլոգ Անի Հակոբյանը։ Նրա խոսքով՝ կրծքագեղձի քաղցկեղը եղել և շարունակում է մնալ քաղցկեղի ամենատարածված տեսակը կանանց շրջանում ոչ միայն Հայաստանում, այլև աշխարհում։ «Կրծքագեղձի քաղցկեղի դեմ պայքարի միակ արդյունավետ մեթոդը կանխարգելումն է։ 1997 թվականին հիմնադրվեց Հայ-Ամերիկյան առողջության կենտրոնը, որը ներդրեց կրծքագեղձի սքրինինգը Հայաստանում։ 2011 թվականից սկսած՝ կենտրոնում ներդրվեց թվային մամոգրաֆիան, որը մեծապես բարձրացրեց ախտորոշման ճշգրտության մակարդակը», - մասնավորապես հայտնեց Անի Հակոբյանը։

Վ․Ա․ Ֆանարջյանի անվան ուռուցքաբանության ազգային կենտրոնի փոխտնօրեն Արթուր Ավետիսյանն իր զեկույցը սկսեց Հայաստանի պետական դրոշի գույների ներկայացմամբ։

Նա անդրադարձավ դեռ հին ժամանակներից արվեստում ընդգծվող կանացի կրծքի` որպես մայրության և գեղեցկության խորհրդանիշ կարևորությանը։ Արթուր Ավետիսյանը քարտեզի վրա առանձնացրեց այն երկրները, որտեղ բարձր է կրծքագեղձի քաղցկեղով հիվանդացության և մահացության ռիսկի մակարդակը։

«2020 թվականին աշխարհում հայտնաբերվել է կրծքագեղձի քաղցկեղի 2 միլիոնից ավելի դեպք, մահերի թիվը՝ ավելի քան 680000։ Հայաստանում 2000 թվականին գրանցվել է 686 դեպք, իսկ 20 տարի հետո՝ արդեն 1324 դեպք։ Ըստ Global Cancer Observatory միջազգային հարթակի՝ Հայաստանը կրծքագեղձի քաղցկեղից մահացության ռիսկի մակարդակով աշխարհում զբաղեցնում է 19-րդ տեղը։ Ի՞նչ անել։ Շատ կարևոր է կրթական և լուսավորչական աշխատանքների դերը։ Կինն, ուղղակի, պետք է հարգի սեփական օրգանիզմը», - շեշտեց Վ․Ա․ Ֆանարջյանի անվան ուռուցքաբանության ազգային կենտրոնի փոխտնօրենը։

Հարցեր, պատասխաններ, մեկնաբանություններ