Աննախադեպ համագումար և պատմական իրադարձություն. ՀԲԱ−ն դարձավ ասոցիացիաների ասոցիացիա. med-practic.com

Մայիսի 14-ին Հայ-ամերիկյան առողջության կենտրոնում տեղի ունեցավ Հայկական բժշկական ասոցիացիայի (ՀԲԱ) համագումարը, որին ասնակցում էին 34 մասնագիտական ասոցիացիաների պատվիրակներ։ Օրակարգում ՀԲԱ կանոնադրական փոփոխություններն էին և ղեկավար կազմի ընտրությունները։

Համագումարը ղեկավարում էր ՀԲԱ գործող նախագահ Արմեն Սողոյանը։ Մեզ հետ զրույցում պարոն Սողոյանը մանրամասնեց հանրագումարի առանձնահատկությունները։

− Պարոն Սողոյան, կարո՞ղ եք ներկայացնել, ինչով է զբաղվում Հայկական բժշկական ասոցիացիան։ Ո՞րն է ասոցիացիայի գործունեության շրջանակը։

− ՀԲԱ-ն այս պահից սկսած զբաղվելու է առողջապահության ոլորտի բոլոր հարցերով, քանի որ մեր այսօրվա հանրագումարից հետո ասոցիացիան դարձել է ասոցիացիաների ասոցիացիա։ Ներկայում 34 ասոցիացիա միավորվել է, բայց մոտ ապագայում թիվը կաճի։ Միավորված ասոցիացիաները համարվում են ՀԲԱ «տերերը»։ Այսուհետ առողջապահության ոլորտի սկզբունքային բոլոր հարցերը կամ առաջարկները պետք է քննարկվեն ՀԲԱ հետ, իսկ ՀԲԱ-ում կքննարկվեն մասնագիտական հանրույթը ներկայացնող կազմակերպությունների հետ և կարտահայտվի հավաքական կարծիքը, միայն այդ դեպքում, որևէ մեկը կարող է խոսել առողջապահության ոլորտի անունից։ Նաև անհրաժեշտ է ժամանակ, որպեսզի և անդամ կազմակերպություններին և ոլորտի պատասխանատուներին հասկանալի լինեն բոլոր փոփոխությունները, և դրա կարևոր հետևանքները։

− Այս համագումարի շրջանակում փոփոխվեց ՀԲԱ կանոնադրությունը։ Ի՞նչ փոփոխություններ տեղի ունեցան, ինչո՞վ էր տարբերվում այս համագումարը նախկիններից։

Այո, սա աննախադեպ համագումար է և պատմական իրադարձություն, ինչպես նշեցին բոլոր ելույթ ունեցողները։ Մինչև համագումարի կայանալն անհատ բժիշկների համախմբված ասոցիացիա էր, որոնց թիվը չէր կարող մեծ լինել։ Ճիշտ է, ասոցիացիան բժշկական էր, բայց չէր ներկայացնում ամբողջ բժշկական հանրությանը։ Հիմա պատկերն այլ է, արդեն 34 մասնագիտական ասոցիացիա այս մեծ ընտանիքի անդամ է։

Մինչև փոփոխությունը ՀԲԱ ասոցիացիային անդամակցում էին ֆիզիկական անձինք, այժմ՝ իրավաբանական կազմակերպություններ։ Սա նշանակում է, որ նեղ մասնագիտական ասոցիացիաները, շարունակելով մնալ ինքնուրույն, միանում են ՀԲԱ−ին, դրանով իսկ դառնալով ՀԲԱ որոշիչ «տերեր», ինչպես մեր գրեթե բոլոր մասնագիտական ասոցիացիաները անդամակցում են համաշխարհային կամ տարածաշրջանային ասոցիացիաներին, առանց ինքնուրույնության որևէ կորստի, ավելին՝ դառնալով այդ կազմակերպությունների անդամ, իրավունք են ստանում ազդել ընդունվող որոշումների վրա, ընտրել և ընտրվել ղեկավար մարմնում: Այդպես էլ կլինի այս դեպքում։

Հաջորդ կարևորագույն արձանագրումն այն է, որ որևէ քաղաքական գործընթացներին ասոցիացիան չի մասնակցի, քանի որ իմաստ չկա, որ բժշկական ասոցիացիան աջակցի կամ սպասարկի որևէ քաղաքական ուժի։ Ընդհակառակը, ճիշտ աշխատելու դեպքում մենք համոզված ենք, որ քաղաքական ուժերն իրենք կցանկանան սպասարկել այն ծրագրերը, որոնք կընդունի ասոցիացիան։

− 2023 թվականին պետք է կայանա հայ բժիշկների գիտաժողովը։ Ի՞նչը կխանգարի անցկացնել միջոցառումը Արցախում։

− Եթե այդ ամբողջ ընթացքում Արցախը լինի նույն կարգավիճակում, որ հիմա է, երբ անորոշ է ամեն բան, մենք չենք կարող արտերկրից ժամանած մեր գործընկերներին հրավիրել Արցախ։ Բայց աշխարհն արագ է փոփոխվում, և դեռ մեկ տարի առաջ մենք մեր ամենավատ երազում անգամ չէինք կարող պատկերացնել այն, ինչ տեղի ունեցավ Արցախում։ Եթե մեկ տարում որոշ բաներ փոխվեցին դեպի վատը, ո՞վ է ասում, որ չի կարող մեկ տարում փոխվել նորից դեպի լավը, նույնքան արագ և անսպասելի։ Մեզնից յուրաքանչյուրը պետք է անի ամենը, ինչն իրենից է կախված։ Մենք մեր այսօրվա համագումարով ցույց տվեցինք, որ պատրաստ ենք անել հնարավորը և նույնիսկ` անհնարինը։

Ասոցիացիայի ընտրված նախագահ Հովհաննես Հովհաննիսյաննի հետ խոսեցինք ընտրված նախագահի ինստիտուտի կարևորության մասին։

- Ինչպես արդեն խոսվեց, փոխվել է ասոցիացիային անդամակցության ձևը, սա է առանցքային փոփոխությունը, որը տեղի ունեցավ, բայց նաև ստեղծվել է ղեկավարման նոր՝ ընտրված նախագահի ինստիտուտը, որի ներդրմամբ՝ կանոնադրության ուժով, ՀԲԱ նախագահը փոխարինվում է երկու տարին մեկ։ Այս մեխանիզմը նվազագույնի է հասցնում անձնական կամ խմբային հավակնությունները ասոցիացիայում։

Սրտաբանության ինստիտուտի տնօրեն, Երևանի գլխավոր սրտաբան, ՀԲԱ հիմնադիր նախագահ Պարունակ Զելվեյանը, խոսելով ասոցիացիայի գործունեության կարևորություն մասին, ասաց․

- Հայկական բժիշկական ասոցիացիայի կարևորությունը մեծ է։ Այն զբաղվում է ինչպես բժիշկների շահերի պաշտպանությամբ, այնպես էլ առողջապահական համակարգի հիմնախնդիրների վերհանմամբ և հանդես է գալիս համապատասխան լուծումների առաջարկությամբ։ Այսօր ՀԲԱ-ն նոր էտապ մուտք գործեց ՝ դառնալով ասոցիացիաների ասոցիացիա, ինչը նշանակում է, որ բոլոր մասնագիտական ասոցիացիաները հավաքվեցին մեկ հովանու ներքո։ Սա բեկումնային քայլ էր։ Երբ 2000−ականների սկզբին հիմնադրվեց ՀԲԱ−ն, մենք իհարկե ցանկանում էինք մեծ հաջողություններ գրանցել, բայց որ կհաջողենք այսքանով, այսքան արագ այդպիսի երազանք անգամ չունեինք։ Այս նոր և հզորացած մարմինը, հուսով եմ, կլինի ՀՀ ամենահզոր առողջապահական կառույցներից մեկը։

Հարցեր, պատասխաններ, մեկնաբանություններ